OQO presenta no XI SALÓN DO LIBRO INFANTIL E XUVENIL DE PONTEVEDRA un proxecto sobre os ‘Contos do camiño’

OQO presenta no XI SALÓN DO LIBRO INFANTIL E XUVENIL DE PONTEVEDRA un proxecto sobre os ‘Contos do camiño’

xoves, 11 de Febreiro de 2010

Este traballo leva por varios países de Europa unha maleta con contos en diferentes idiomas para que os nenos coñezan diferentes culturas.

A editora OQO presentou hoxe no Café Moderno de Pontevedra o seu proxecto 'Contos do camiño', un traballo co que están a levar por toda Europa contos que se recolleron en diferentes lugares de Galicia polos que pasa o Camiño de Santiago. Esta presentación forma parte dos actos do Salón do Libro Infantil e Xuvenil de Pontevedra que ata o vindeiro 14 de marzo se está a desenvolver na cidade.

OQO presentou o proxecto como unha maleta chea de contos que comezou a circular no mes de xaneiro por Portugal e que neste momento se atopa en Burdeos. En marzo o programa regresará a Portugal, en abril estará en Madrid e xa en maio chegará a Santiago de Compostela.

'Contos no camiño' é un proxecto que se iniciou hai tres anos e no que participaron máis de 15.000 nenos galegos. O obxectivo era chegar a un punto de encontro entre diferentes países, culturas e idiomas a través do Camiño de Santiago, o percorrido no que se atopa xente moi diversa que durante o día camiña e pola noite espanta o medo e o frío con contos. Pero con contos que non só son de Galicia, senón que proveñen dos lugares de cada un dos camiñantes, e que fan de Galicia unha terra cunha gran cultura do conto.

Unha vez rematado o proxecto, o que máis importa a OQO é que non quede nun caixón. Que non teña un punto e final, un remate. Por iso espera que as escolas amosen a súa colaboración e continúen a traballar co material da editora nos centros educativos. A presentación do proxecto rematou esta tarde coa proxección do conto A princesa do Caurel, unha das historias que tamén está a circular por toda Europa na maleta de Contos do camiño.