Yllana porá en escena ‘Star Trip’ este domingo no Salón do Libro de Pontevedra

Yllana porá en escena ‘Star Trip’ este domingo no Salón do Libro de Pontevedra

mércores, 18 de Marzo de 2015

A premiada compañía de teatro Yllana traerá a Pontevedra, da man do Salón do Libro Infantil e Xuvenil, o seu espectáculo ‘Star Trip’, unha obra que adentra ao espectador no alucinante e absurdo mundo da ciencia ficción e do espacio.

A representación terá lugar este domingo, 22 de marzo (18:30 horas), no Auditorio do Pazo da Cultura, e as entradas, a 3 euros, xa se poden mercar en Ataquilla.com ou no teléfono 902504500. No caso de sobrar, poranse á venda as restantes no propio Pazo dende unha hora antes de que comece a función.

‘Star Trip’, recomendada para público familiar a partir de oito anos, está protagonizada por catro intrépidos astronautas que levan medio século hibernando dentro dunha nave espacial que vaga polo espazo. O seu obxectivo é destruir todo tipo de vida intelixente no universo.

Os actores que dan vida a tan particulares personaxes son Antonio Pagudo (conocido polo seu papel de Javi na serie televisiva ‘La que se avecina’), Fidel Fernández, Raúl Cano e Juan Ramos.

O espectáculo, duns 75 minutos de duración, comeza co despertar da tripulación e a súa loita por dominar unha nave que parece ter vida propia. A comedia vén dada polos diferentes mundos cos que van colisionando os catro astronautas.

Ademais, a compañía teatral destaca o coidado da banda sonora da peza e os elaborados efectos visuais, que renden homenaxe a xéneros como a ciencia ficción.

Yllana naceu en 1991 como compañía de teatro de humor xestual. Ata a actualidade produciu 17 espectáculos, que se representaron en 33 países e foron vistos por máis de un millón de espectadores. Moitos deles foron premiados, como ‘Zoo’, ‘Brokers’, ‘Muu’, Paganini’ ou ‘Glub Glub’.

Ademais da función que se representará o domingo para o público en xeral, Yllana tamén ofrecerá un pase concertado para os centros escolares o vindeiro luns, 23 de marzo, ao que asistirán arredor de 500 rapaces de toda Galicia.